Lamtumira e brazilianit Leonardo nga posti i drejtorit të përgjithshëm të klubit të PSG do të sjellë ndryshime të rëndësishme në departamentin që merret me merkaton e parisienëve.
Nëse nën drejtimin e brazilianit orientimi ishte te shpenzimet kolosale pa pyetur për shifrat që dilnin nga llogaritë e sheikëve, tanimë duket se klubi po mendon që të zbulojë vetë talente.
“L’ Equipe” bën të ditur se parisienët kanë firmosur më Luis Kampos, portugezin i cili ka bërë të lumtur klubet e Monako dhe Lilës falë nuhatjes për talente të reja apo futbollistë të cilët mund të bliheshin me çmim të ulët e shiteshin me një kosto të lartë.
Emra si Mbape, Marsial, Fabinjo, Bernardo Silva apo Osimhen kanë kaluar të gjithë në duart e tij, ndaj PSG ka vendosur ta emërojë atë këshilltar për merkaton, duke i dhënë mundësinë që të zbulojë yjet e të ardhmes. Luis Kampos ka nënshkruar për 3 vite dhe pritet që të ketë vendimmarrje për çdo gjë që ka lidhje me afrimet në klub, ndërsa me largimet do të merret Antero Henrike.
